Tevgera Azadiya Kurd ku girîngiya dîrokî û siyasî ya banga "Aştî û Civaka Demokratîk" a Birêz Abdullah Ocalan a 27'ê Sibatê dide ber çavan û bi rêbaza çareseriyê tev digere, biryara wê ya danîna çekan nîşaneyeke şênber e ji bo bawerî û hêviya çareserkirina pirsgirêka sed salî. Bi vê gavê, Tevgera Azadiya Kurd wek berê îro jî berpirsyariya xwe ya dîrokî bi cîh anî û gavên pêwîst avêtin ji bo pêkanîna çareseriyeke demokratîk. Bi vî rengî, hemû mercên ji bo damezrandina aştiyeke domdar û avakirina civakeke demokratîk seferber kirin û hêviya jiyana hevpar a gelan mezin kir. 

Çareseriya pirsgirêka Kurd ku wek encameke siyaseta înkara sed salî derket holê, bi rêbazên demokratîk û aştiyane ne tenê ji bo gelê Kurd, di heman demê de ji bo hemû gelên herêmê xwedî wate ye. Çareseriya vê pirsgirêkê ne tenê meseleyeke siyasî ye, di heman demê de ji bo avakirina aştiya civakî, wekhevî û azadiya gelan pêwîst e. Di vê çarçoveyê de, banga Birêz Ocalan ne tenê pêşniyareke çareseriyê ye, di heman demê de ravekirina têgihiştinekê ye ku îradeya jiyana hevpar a gelan esas digire.

Ax û welatê ku heta niha bûye şahidê gelek şer û pevçûnan, bi dehan salan berdelên giran dane. Êşên ku hatine kişandin, berdelên ku hate dayîn girîngiya vê pêvajoyê bêtir berbiçav dikin. Niha gel, bawerî û nasnameyên cûda gelek nêzîkî avakirina aştî û jiyana azad in ku jê re hesret mane. Niha dem ew dem e ku ew ked û berdelên bi dehan salan dayî bi civakeke demokratîk werin tacîdarkirin. Ji ber vê yekê divê hemû beşên civakê bi rengekî xurt xwedî li îradeya çareseriyê derkevin û lazim e ku ev pêvajo bibe armanca hevpar a her kesî. Avakirina rêya ber bi aştiyê ne tenê bi bêdengkirina çekan, lê di heman demê de bi veguherîneke civakî pêkan e. Pêşengiya vê veguherînê berpirsyariya hemû aliyan e.

Berpirsiyariya sereke ya desthilat û dewletê ew e ku gavên avêtî bi awayekî erênî pêşwazî bikin û ji bo aştiyeke mayînde gavên pêwîst biavêjin. Berdana çekan tenê destpêkek e; lê domdarkirina pêvajoyê bi gavên ku desthilat û dewlet dê biavêjin pêkan dibe. Avakirina hawîrdoreke aştiya rastîn bi dawîkirina cudakariyê û garantîkirina mafên bingehîn pêkan e. Di vê qonaxê de berpirsyariya desthilat-dewletê mezin e. Di vê çarçoveyê de yek ji gavên pêşîn ku dê bêne avêtin ew e ku pêvajo were mîsogerkirin û li ser bingeheke qanûnî were rûniştandin.

Hemû dînamîkên siyasî û civakî jî lazim e ku di vê pêvajoyê de berpirsyariyê bigirin. Avakirina pêşerojeke wekhev û azad bêguman dê bi xebat, empati û têgihiştina gelên Kurdistan û Tirkiyeyê bileztir pêk were û serkeftî bibe. Daxwaza bingehîn a hemû civakê ye ku saziyên siyaseta demokratîk, rêxistinên civaka sivîl û rêxistinên pîşeyî di vê pêvajoyê de roleke avakar bilîzin, bi aqilekî hevpar tev bigerin û piştgiriya herî xurt bidin.

Damezrandina aştiyê ji bo hemû gelên Rojhilata Navîn, bi taybetî Kurdistan û Tirkiyeyê, garantiya îstiqrar û ewlehiya domdar a herêmê ye. Di vê çarçoveyê de banga Birêz Ocalan sembola destpêka rêya ber bi aştiyê ve ye û ji hemû civakê/erdnîgariyê re  hêviya ronahiyê ye. Ji bo avakirina civakeke demokratîk a li ser bingeha aştî, edalet û wekheviyê, pêwîst e ku pev re xebateke hevaheng û hevpar were meşandin. Wek Partiya Herêmên Demokratîk, ji bo xwedîlêderketin û serkeftina vê pêvajoyê em ê berpirsyariya xwe heta dawiyê bi cîh bînin. Wek ku Birêz Ocalan jî diyar kir, em baweriya xwe bi hêza siyaseta demokratîk û aştiya civakî tînin, ne bi çekan, û em ê ji bo pêkanîna vê prensîbê tê bikoşin.

Partiya Herêmên Demokratîk

***

Bi aştîya komelkî û hêzê ravurnayoxî yê polîtîkaya demokratîke, ma komelê demokratîkî awan bikerê!

Qerarê çekronayîşê Têgêrayîşê Azadî yê Kurdano ke seba çareserîye xîret keno û bala xo dano girîngîya sîyasî û tarîxî yê vengdayîşê “Aştîye û Komelê Demokratîkî” yo ke 27ê sibate de bi destê Birêz Abdullah Ocalanî virazîya, îfadeyo şênber ê hêvîye û bawerîya vera çareserîya persa seserre yo. Bi na game Têgêrayîşê Azadî yê Kurdan seke verê cû kerd, ewro zî mesuldarîya xo ya tarîxî arde ca, seba çareserîya demokratîke gamê ke hewce kenê, eştî. Bi no hawa Têgêrayîşê Azadî yê Kurdan seba awankerdişê aştîyêka timî û komelê demokratîkî heme şertê xo amade kerdî, hêvîya cuya hempare ya şaran hîna pîl kerde.

Bi metodanê demokratîk û aştîyane çareserkerdişê persa kurdana ke sey netîceya polîtîkaya înkarî ya seserre peyda bîye, têna seba şarê kurdî nê, seba heme şaranê herême girîng o. Çareserîya na perse têna meseleya sîyasî nîya, eynî dem seba awankerdişê aştîya komelkî, wayûbirayî û azadîya şaran mecburîyet o. Nê konteksî de vengdayîşê Birêz Ocalanî, têna pêşnîyaza çareserîye nîyo, heman wext feraseto ke îradeyê cuya hempare yê şaran o esas geno yo.

Dej û bedelê giranî yê ke verê cû dîyayî, girîngîya nê prosesî yewna mojnenê. Êdî tay mendo ke aştîye û cuya azad a ke şarî, bawerîyî û nasnameyê bînî bîrîya ci kenê, bêrê awan kerdene. Êdî komelê demokratîkî reyde wextê tacîdarkerdişê kede û bedelanê ke bi desan serrano dîyenê, ameyo. Ganî komel de her merdim bi şeklêko hêzdar wayîrê îradeyê çareserîye bivejîyo û ganî no proses hedefê her kesî yo hempar bibo. Rayîro ke ver bi aştîye şino, têna bi bêvengbîyayîşê çekan nê, heman wext ravurîyayîşo komelkî reyde mumkun o. Her kesî de mesuldarîya serkêşbîyayîşê nê ravurîyayîşî est a.

Îqtîdar û dewlete seba ke bi hawayêko bîyaye gaman rê cewab bido û seba eştişê gamanê ke vernîya aştîyêka timî akenê, mesuldaro eslî yo. Ronayîşê çekan têna destpêkêk o; la timîbîyayîşê prosesî bi gamanê ke îqtîdar û dewlete do bierzo mumkun beno. Awankerdişê aştîyêka rastikêne peynîardişê cîyakerîye û garantîkerdişê heqanê serekeyîyan mumkun o. Na babete de mesuldarîya îqtîdar û dewlete zaf pîl a. Na mana de garantîkerdişê prosesî û dekerdişê zemînê qanûnî yê ey, gamanê verênanê ke do bierzîyê ra yew o.

Heme dînamîkê sîyasî û komelkî nê prosesî de ganî mesuldarîye bigêrê destê xo. Awankerdişê ameyoxêkê têduşt û azadî bêguman bi xîret, empatî û famê şaranê Tirkîya û Kurdîstanî lez bibo û bireso serkewtiş. Dezgehê polîtîkaya demokratîke, rêxistinê komelê sîvîlî û rêxistinê meslekî ganî nê prosesî de rolêkê viraştoxî kay bikerê, bi aqlo hempar têbigêrê û bi hawayêko tewr zîyade hetkarî bidê.

Awankerdişê aştîye û komelê demokratîkî têna proseso sîyasî nîyo, eynî wext ganînîya komelkî ya. Sere de Tirkîya û Kurdîstan, seba pêro şaranê Rojhelatê Mîyanênî awankerdişê aştîye, herême de garantîkerdişê asayîş û aştîya timî yo. Na çarçewa de vengdayîşê Birêz Ocalanî, destpêkê rayîro ke ver bi aştîye şino sembolîze keno û heme komel û cografya rê roştîya hêvîye beno. Bingeyê aştîye, edalet û têduştîye de, seba awankerdişê komelê demokratîkî ganî her kes pîya bixebitîyo. Seba ke ma wayîrê nê prosesî bivejîyê û biresê serkewtiş, ma sey Partîya Herêmanê Demokratîkan do wezîfeyê xo bîyarê ca.

Partîya Herêmanê Demokratîkan